Teologi Kurung

Teologi Kurung (Jangkrik)

Oleh: Seri Ginting M.

 

Ibas kegeluhen kalak Karo pasti lit masana kita mengket rumah simbaru entah pe ngingani rumah simbaru. Setiap kali simasuki rumah simbaru entah pe kita ngontrak rumah, maka si bahan me ibadah mengket rumah bagi si enggo rusur i laksanaken. Biasana kita si enggo erkiniteken man Tuhan Yesus ibas memasuki rumah si mbaru, sibahan me ibadah buka kunci ibas gelar Bapa, Anak ras Roh Kudus. Pendeta nalangi rumah e, janah i ikuti  jemaat memasuki rumah e untuk ngelakoken ibadah sesuai liturgi si enggo i tetapken gereja. Enca dung ibadah e maka ibagiken cimpa lepat (menurut kebiasanta) I ikuti ras man pepagi. Kenca dung man I lanjutken alu acara ngerana-ngerana ngucapken selamat arah kade-kade undangen, e maka I aloi si mengket rumah, e maka I tutup ka ibas toto. Endam si la banci lang, tapi lit kang piga-piga si lenga ia I dungken utang adatna, e maka banci ka ia I lanjutken ku acara nggalari utang adat sesuai peradaten kalak Karo.

            Nginget-nginget kai si enggo si lakoken e, enggom mejile perban tetap sipertahanken budayanta sebagai kalak Karo si erkiniteken man Tuhan Yesus. Tapi lit si ketadingenta menurut kebudayaan kalak Karo Sinai, em me masalah mbaba nakan dem; dem sada kudin. Nakan dem e ipan simbengketi rumah simbaru e. Erti nakan dem eme ; adi kita enggo masuki rumah simbaru, e maka singingani rumah e la kekurangen, dem alu pasu-pasu. Sebab adi kita kalak Karo si igelari ipasu-pasu Dibata; ngasup ertenah (mbere man kade-kade), bage ka pe ndahi tenah kade-kade. Ibas kita nenahken kade-kade ibas mengketi rumah si mbaru e, maka la kita kekurangen sebab Dibata sincukupken kebutuhenta; nina bas Yesaya 58:14c: “Aku akan memberi makan engkau dari milik pusaka Yakub, bapa leluhurmu. Sebab mulut TUHANlah yang mengatakannya”.

Bengkau nakan dem ndai eme kurung (jangkrik); kurung e igule bagi nggule nurung. Pengertianna maka kurung iban, gelah kurung tendi rumah. E maka lit kuning-kuningen (teka-teki) kalak Karo; njengir la gajah, madit la kuda, ganjangen turena asa rumahna! Kuning-kuningen e ipeseh man kerina tamu undangen, emaka njawab tamu ndai secara serentak “kurung”.

            Kurung tendi rumah ertina, maka kita singingani rumah e terjaga ras terpelihara I rumah, lanai banci dat gangguan kai pe. Iban gulen kurung perban kurung e lit maknana, makna kurung; kurung I ukurkenna masa depan na, ia lalap ngukurken masa depan untuk kegeluhenna; I pepulungna nakanna ibas rumahna ndai, gelah bas musim perudan entah pe musim kai pe lit rusur perbekalen. Sipeduaken iukurkenna ka keselamatenna ibas rumahna (lubang/ asarna), e pinusuna gelarna. Entah reh lau perudan, e maka enggo lit inganna erlindung ibas pinusuna ndai, e maka lanai ia banci kena lau.

            Adi nai sidalanken mengket rumah e alu peradaten kalak Karo, e maka pas kel ia jadi bagi nakan dem ras makna kurung ndai. Adi gundari kita kalak Karo sierkiniteken pada umumna ndalanken mengket rumah simbaru e guna ndatken pasu-pasu ibas rumah e saja. Padahal nai nari pe nini bulang ta enggo ngukuri tentang keselamatan bagi  pengertian kurung ndai. Nininta nai nggunaken alat (nakan dem ras kurung) guna ngingetken tentang pasu-pasu ras keselamaten.  E maka setiap mengket rumah, teologi kurung e harus jadi pedomenta sebagai kalak Karo gelah ula pasu-pasu saja sidatken, tapi keselamaten ibas Tuhan Yesus sipentingna harus I peseh (Yohanes 14:6). (JSB)