Banci Ganti Kalimbubu

Banci Iganti Kalimbubu

(Edi Suranta Ginting)

------------------------------------

Mulih gereja, kupernehen sekalak teman merga Sembiring si kurang siang kuidah ayona. “Lit ka nge perbeben impal enda,” ateku bas ukurku.  Perbahan sibuk  ngaturken alat-alat musik gereja, maka lenga sempat ngerana ras impalku Sembiring mergana ndai.

Muat mulih ku rumah, mentas aku arah kede ingan minem la ndauhsa bas gereja nari. Kuidah impalku, Sembiring mergana e  kundul i kede ngala ku dalan. Arah pengenenna reh tambahna pengakapku maka lit babanna si mberat.

Emaka nusur aku bas motor nari, kudahi impalku e. “La kam mis mulih impal?” ningku bage nenggeti ia. Minter canggah ayo Sembiring mergana, nenna aku, ”Kam nge, kundulken yah. Kai inemenndu, pindo,” nina ngaloi aku.

Kenca reh teh manis ku aku, agak sengget kange aku sebab la kuidah gelas inemen i lebe-lebe Sembiring mergana. “Uga nge ibanndu e impal. Minem nindu bangku, tapi la kuidah kam minem.” “Ue ma,” nina ngaloi bage begi bage lang sorana, “Buk, saya kopi hitam ya,” nina man si erbinaga.

Janah kuinem teh manisku, kutatap impalku Sembiring mergana, “Kai nge sierbahansa maka enggo bene kerina keriahen ukur si rusur teridah bas kam,” ningku. Cirem sitik Sembiring mergana. Gawerna kopina, tatapna ka aku. Inemna sada teguk kopina.

“Mekatep dahkam, kita ngerana-ngerana adi nggeluh bas pertibi enda, si laterukurken pe banci jadi bas kegeluhenta,” nina mbenaken percakapen.

“Engkai maka rempat bage nindu ngerana?” ningku nungkun.

“Ipesilahang, impal, ipesilahang,” nina Sembiring mergana alu kesah si mberat kel pendaratna. Sinik aku kutatap ayo Sembiring mergana. Kucidahken arah ayongku maka aku ersimpati man bana ras nggit ndengkehken kai isi pusuhna.

“Adi bas darat enda kita ipesilahang, e enggo me biasa impal. Tapi enda, labo kalak si deban di pesilahangsa, tapi anak jabunta kel.

“Lenga kuangka kel maksudndu e impal. Tapi, kubegi beritana maka minggu si lepas ku Jakarta kam ndahi kerja beberendu, ndiganai kam mulih,” ningku nungkun. Situhuna, labo pas kel penungkunenku e, tapi aku pe lanai beloh nungkun.

“Em kap dalanna impal. Dahkam minggu si lepas itenahken impalndu teruhenku aku ku Jakarta, perbahan bebere si nguda, si diberu atena njabuken bana.  Bereken impalndu ndai ongkos pesawatku ku Jakarta. Wari Senin si lepas aku ku Jakarta. Impalndu si deban reh wari Rabu dahkam piga-impalndu e tading i Bandung ras Jakarta. Emaka, bas wari Rabu enggo pulung kami sepuluhna anak bapa, lima si dilaki ras lima si diberu. Bas berngi wari e kap rehna perbeben e.

‘Kai kin masalah na e impal,” ningku nungkun aminna pe labo perlu man sungkunen sebab enggo ersikap impal Sembiring mergana nurikenca.

“Bas berngi wari kenca dung man, maka ngerana-ngerana kerina kami i je alu meriah ukur. Impalndu si nguda, si Jon, ngerana man bebere kami sintua si enggo tamat bas akademi polisi nari. “David, kau belilah jas kami semua mamamu ini supaya metunggung nanti pesta adikmu.”

“Kok aku, Ma. Kan yang kawin Brina, dia donk yang belikan mama jas, kan suaminya juga sudah AKP,” nina David e ngaloi.

“Mama minta sama kamu, kok kamu lempar lagi ke adik kamu. Kalau mama-mama ini  ga ada, mana bisa jalan pesta adik kamu,” nina Jon enda ka bage tempa-tempa merawa sorana.

“Biar aja, Ma. Kalau ga jadi juga aku ga masalah, orang yang kawin bukan aku kok,” nina ka David ngaloi alu nina kalak si genduari ‘ketus’.

Rempet reh Sabrina i dapur nari ras ngerana ia alu emosi, “Kok mama jahat ya, kok mau batalin pernikahan Brina? Biar mama tahu aja, ya, tidak ada yang bisa membatalkan rencana pernikahan ini, tidak ada hak Mama membatalkannya. Emangnya Mama siapa?”

Sip ras jengang kami kerina. Aku pe sengget bagi mbegi lenggor i ciger wari e mbegiken perbelas beberengku si kitik-kitik denga nai kuembah-embah.

Perbahan enggo sigangen sora, maka ndarat impalndu Nd. David ras silih. “Kai ndai e Jon, megang kuidah soram man beberem e?” “Ajarkenlah anakndu e ka. La kuakap lit mehamatna man kami mamana,” nina ka Jon ngaloi nalahken bebere kami.

Lenga nungkun pe nandena, minter ngerana Sabrina, “Mama ini jahat semua, Mak. Masak mereka bilang mau membatalkan pernikahanku. Maka aku bilang, tidak ada yang bisa membatalkannya. Kalau ada niat  membatalkan itukan sama dengan sabotase. Orang yang sabotase bisa ditangkap atau ditembak aja sekalian nanti sama abang.”

Mbegi kata ditangkap e, mis ka naik darehku, mis aku cinder, kualaken ku bebere e, ningku, “Sabrina, biar Sabrina tahu, kalau mau tangkap mama, tangkap sekarang. Mama ini anak tentara, ayah mama pejuang 45, mama tidak takut kalau hanya sama polisi. Biar Sabrina tahu, kalau mama tidak ada, tidak akan bisa jalan pestamu. Silakan menikah tanpa pesta adat.”

“Minter cinder nandena ras silih. Salah kam e ka tua. Ula pebelinkendu kalimbubundu e. I Jakarta enda, piga gerobak pe banci ban kami jadi kalimbubu kami. Gelah tehndu saja, ka tua ras kam kerina turangku ras seninangku, i rumah enda nari nandangi turah me pagi calon-calon pejabat tinggi i negara enda. Emaka ula kamu kerina macam-macam. Mulih kam kerina, ula nai latihi ukur kami, mbue enda man ukuren, pasu-pasu, nganting manuk, kerja, ras resepsi. Bas kerina acara e, lape kam je sada pe erdalan ras sikap pagi kerina. Tapi, adi reh pe atendu, ialo-alo kami.

“Sengget kal aku ndengkehkan pengerana impalndu e. E maka bas berngi si ndai lawes kami kerina ku rumah impaldu si nomor telu. Bas mobil aku lanai ateku ngerana. Sesak kal kuakap. Adi je denga mindai bapa ndube, labo bagenda jadina ateku, janah mamburen iluhku e. Impal-impalndu si deban si sada mobil kami ngerana nina,  “Labo tuhu arah ia e ka tua. Labo ise pe pagi pang ngaloken tukur e adi la kin kam je. Emaka reh nge pagi turangnta e ndahi kita ka tua. Emaka, kerina kita, siwahna kita ersadalah ukurta, ula sada pe kita kuje.” Emaka ersada ukur kami siwahna la ku rumah impalndu e.

Seh wari Jumat karaben, je wari ipasu-pasu bebere e. Bas pusuhku, ngarap aku reh min Nd. David ndai mindo maaf. Adi reh lah ia, ngasup aku petalu-talu ukur kerina impalndu gelah ula mela kerina kami keluarga ateku. Seh karaben wari, ise pe lalit reh ras lalit telepon pe. Nandangi berngi, reh telepon piga-piga impalndu, senina kami sembuyak bapa, nungkun kerna kelarehen kami. “Ula bage min, Ka, rehlah kam ku nganting manok e, uga nge kari ban kami la kam je singalo bere bere,” nina. “Ue yah,” ningku ngaloi aminna pe bas nge sorangku e.

Jumat berngi e, pulung kami kerina i rumah impalndu. Nimai kami, uga nge kari turi-turinna ate kami. La kami sada pe si medem-medem. Sabtu erpagi-pagi, e me wari kerja. Lampas reh telepon bas seninangku maka nina enggo ibahan impalndu, nande si David  si ngalo bere-berena merga Karo-karo, kalak si erpangkat. Ia nge marenda namaken bebere sintua e sekolah bas akademi ras si petandaken bebere sierjabu enda pe ia ka nge. Memang mehuli kel jelmana Karo-karo mergana e. Aku pe mekatep nge ku rumahna asum ngurus-ngurus persekolahen bere bere sintua e. Emaka, aku pe erkemamangen engkai maka nggit ia jadi singalo bere-bere.

Kenca kubegi berita enggo sambari Nd. David kalimbubuna, enggo sambarina singalo bere-bere bas perjabun anakna si diberu, enggo keri kel belas-belasku. Minter kupindo penampat man impalndu gelah buatna tiketku mulih. Enggo mela pe aku ngidah kerina jelma i Jakarta e.

Bagi isayat-sayat e kuakap pusuhku. Lenga bo ernah kuidah lit jelma sambarina kalimbubuna, adi mbegi berita pernah nge kubegi. Bas pudi metuangku e kap ndu ipesilahang turangta ita, dahkam sehkal nge pagitna. Ngasa pengingetku, labo pernah si lamehuli kuban man turang e. Tenading bapa pe erbagi nge kami kerina, kerina nge daten, anak si dilaki ras anak si diberu. Tuhu aku buen perbahan aku ka simberatna kecibal geluh ku.

Tapi kata Dibata si kubegi ndai mbereken gegeh simbaru man bangku. Nina Rasul Paulus maka ngasup aku ngaloken erbage-bage kecibal nggeluh, sebab Tuhan Yesus kap si pengasup aku. Emaka impal, gundari enda, kai pe ngenda banci jadi. Dung kerja e, lanai pe je kami singalo bere-bere.

Ndengkehkan turi-turin impal Sembiring mergana tuhu-tuhu berbanca nepcep pe pusuhku. Memang pernah nge kubegi lit kalak si pesilahang kalimbubuna perbahan kalimbubuna e erbahan si jahat man turangna ras beberena, tapi ndengkehken langsung bage, la kugejap naktak iluhku.

“Emegegeh lah kam impal. Ula kam sakit. Pebue lah ertoto minta man Dibanta gelah tuduhkenna dalan simehuli man bandu bage pe man keluarga kerina.”  Ersora HP impal Sembiring mergana. “Aku udah dekat, Bapak di mana,” nina sora i HP nari. “Bapak tunggu di depan kedai kopi dekat gereja ya,” nina impal Sembiring mergana ngaloi.

“Bagem impal, enggo ialo-alo permenndu aku. Bujur, enggo ka pegegehindu aku,” nina Sembiring mergana erdalan darat i kede nari. “Ue, impal, Tuhan Yesus simasu-masu kita,” ningku ndungi ranan. Janahku ermotor ku rumah, ningku bas pusuhku, “Uga pe kepe lit nge bas doni enda. Ban bayakna pe banci ka anak beru e lupa ncidahken kinihamatenna man kalimbubuna. Lit ka nge ban la mehuli kalibubu e, maka bene ka anak beruna. Ah, erpengendes man Tuhan saja nge si tuhu –tuhu ras mindo gelah pedauh Tuhan bas sijahat nari.” (ituriken bas kejadin si tuhu-tuhu, tapi gelar, ingan, waktu, ras uruten kejadin isesuaiken guna kiniulin turi-turin e) (esg).